Израелското воено радио објави дека властите ѝ наредиле на армијата да ги запре сите активности во врска со градот Газа, како и поширокиот појас. Оваа информација доаѓа откако американскиот претседател Доналд Трамп, преку видео-порака, побара од Израел да го запре бомбардирањето на Газа, откако претходно Хамас се согласи со предлогот на Трамп да ги ослободи сите заложници.
Израелското воено радио објави дека наредбата ѝ наложува на армијата операциите да ги сведе на минимум, при што трупите на терен исклучиво ќе ги извршуваат таканаречените „одбранбени маневри“. Преговорите за планот на Трамп се очекува наскоро да се одржат.
Трамп, во својата порака, рече дека деталите за планот сè уште не се разработени и дека сите работат на него.
„Врз основа на изјавата од Хамас, верувам дека тие се подготвени за траен мир. Израел мора веднаш да го запре бомбардирањето на Газа, за да можеме безбедно и брзо да ги извлечеме заложниците. Ова не е само за Газа, туку за долгоочекуваниот мир на Блискиот Исток“, рече Трамп.
