Условна казна од две години затвор за докторката онколог Мери Пешевска која призна вина во случајот Онкологија. Пешевска нема да оди во затвор доколку во наредните пет години не стори ново кривично дело, пресуди скопскиот кривичен суд. Таа призна дека го ставила на располагање својот печат и факсимил на шалтер, кој според судот, потоа биле злоупотребувани од првообвинетиот Нино Васев. Практично, со нејзиниот потпис и печат Васев препишувал терапија која наместо да го подобри – го влошила здравјето на седум пациенти.
- „Одобрувал и препишувал лекови каде постои недоследност во дозирањето на лековите и во тајмнигот на апликациите. Давал терапии од новите генерации на таргет и имуно терапија во фаза на лекувањето кога било многу очигледно дека од апликацијата на таквиот лек воопшто нема да има бенефит поради лошиот перформанс статус на пациентот и немањето време да се развие механизмот на дејство“ рече Снежана Марковска – судија во Основен Кривичен суд Скопје.
Пешевска се товари за тешки дела против здравјето на луѓето за што можеше да и биде изречена затвор од три месеци до три години.Според судијката Марковска, условноста на казната не значи избегнување на одговорност, туку предупредување кое може да ја постигне целта на казнувањето.
- „Судот ги ценеше особено последиците од севкупноста на заедничките дејствија кои биле преземени а биле тешки бидјеќи кај седум пациенти дошло до нарушување на здравјето“ рече судијата Снежана Марковска во пресудата.
Како олеснителни околности биле земени предвид фактот дека Пешевска делото го сторила од небрежност, дека призна вина и изрази каење, како и тоа што нема претходни санкции и е вработена на Клиниката за радиотерапија и онкологија од 2002 година.
Пешевска, во завршните зборови, изјави дека била злоупотребена од колегите и дека тогашната пракса дозволувала користење печат од друг онколог за пациентите навремено да ја добијат терапијата.
Нино Васен и уште двајца лекари онколози остануваат обвинети, бидејќи не признаа вината. Васев се товари и во случајот Онкологија 2 заедно со организацискиот поранешен директор Нехат Нухи за финансиски злоупотреби кои биле правени на Клиниката.
