Денес, во просториите на Стопанската комора на Македонија, се одржа работна средба помеѓу претседателот на Комората, г. Бранко Азески, и претставници од Министерството за финансии на Соединетите Американски Држави – г. Томас Метју и г-ѓа Лаура Хостели, советници за приходна политика во Министерството.
Целта на посетата беше размена на информации и мислења за тековните економски предизвици, фискалните политики и можностите за продлабочување на соработката помеѓу двете институции. Особено внимание беше посветено на улогата на приватниот сектор во креирањето на стабилна и предвидлива економска клима, како и на важноста од транспарентни и ефикасни јавни финансии.
Во своето обраќање, претседателот Азески се заблагодари за континуираната поддршка и стратешкото партнерство кое Министерството за финансии на САД го обезбедува во насока на зајакнување на институционалните капацитети и поддршка на економските реформи во Северна Македонија. Тој ја истакна важноста од вакви средби за унапредување на дијалогот и соработката со меѓународните партнери.
На средбата се дискутираше за задоволството на бизнисот од соработката со државните институции надлежни за прибирање на јавните приходи и услугите кои бизнисот ги добива од истите.
Стопанската комора на Македонија изрази задоволство од досегашната соработка со Управата за јавни приходи и Царинската управа, особено во делот на отворениот дијалог и заедничкото решавање на предизвиците со кои се соочуваат компаниите, но и ги истакна отворените прашања и областите во кои постои можност за подобрување.
Комората го поздрави континуираното функционирање на новоформираниот Совет за даночна усогласеност во УЈП и го смета за клучна платформа за транспарентна дискусија, размена на мислења и формулирање на практични решенија во областа на оданочувањето, како и напорите на Управата за решавање на одредени проблеми со кои се соочува бизнисот. Сепак, како приоритети на кои во иднина треба да се работи ги посочи: поголема интеграција на системите за податоци во УЈП, автоматизацијата на процесите и забрзување на издавање даночни акти, јакнење на капацитетите на инспекциските служби и нивна континуирана едукација, со цел идентично постапување на инспекторите при инспекциските контроли, воведување на „бела листа“ на уредни даночни обврзници, забрзување на процесот за воведување на електронска фактура (Е-фактура), континуирани контроли за фискализација, сузбивање на сивата економија во е-трговијата и потребата од создавање на систем за навремениот поврат на ДДВ
Средбата помина во конструктивна атмосфера, со заедничка согласност за продолжување на меѓусебната комуникација и соработка во иднина.
