Основното јавно обвинителство поведе постапка против осум лица поради учество во масовна тепачка што во саботата се случи на улицата „Славеј Планина“ во Скопје.
Во инцидентот, кој настанал поради нерасчистени семејни односи меѓу две групи, две лица се здобиле со тешки телесни повреди, а уште неколку биле полесно повредени. Едно лице е осомничено за обид за убиство откако со дрвена штица тешко повредило едно лице од спротивставената група. Повредениот се здобил со фрактура на черепот и крвавење на мозокот.
Иако станува збор за млад човек кој неодамна наполнил 18 години, Обвинителството предложи мерка куќен притвор поради ризик од бегство, влијание врз сведоци или повторување на делото.
Друг осомничен е обвинет за нанесување тешка телесна повреда откако со тупаници му ја скршил долната вилица на еден од учесниците во тепачката. Преостанатите шест лица се осомничени за кривично дело учество во тепачка. За нив се предложени мерки на претпазливост.
