Инспекторите на терен проверуваат колку се почитува владината мерка „Училишна кошница“. По првиот ден од стапувањето на сила на одлуката за намалување на цените за училишниот прибор, оценката на Пазарниот инспекторат е дека генерално мерката се почитува од страна на книжарниците.
„Има објекти кои навремено се подготвија и ги истакнаа цените и попустите, а има и такви на кои им треба малку повеќе време да се прилагодат. Генерално одлуката од вчера се почитува особено кај големите трговци, но треба да видиме и како ќе се справат и помалите. Ние сме во постојана комуникација со трговците и за било какви нејаснотии им излегуваме во пресрет, но владината одлука е јасна и секој мора да ја почитува. Ние ќе вршиме контроли и ќе го следиме процесот, со цел сите трговци да ја испочитуваат мерката“, вели директорот на ДПИ, Влатко Стојкоски.
Според одлуката, трговците мора јасно да ја истакнат старата и новата цена, а на видно место да постават плакат со натпис „Помалку трошоци, повеќе за тебе“. Тоа е обврска, а не препорака. Кој нема да почитува, ќе се соочи со санкции.
„Постојано вршиме мониторинг и инспекциски надзори и доколку забележиме неправилности ќе бидат направени понатамошни законски постапки“, порачува Стојкоски.
Инаку и Алфа вчера направи обиколка низ поголемите книжарници во центарот на Скопје и забележавме дека дел од трговците се прилагодиле, дел ни кажаа дека им требало време, но попуст секаде имаше, кој иако не беше означен на рафтовите , се преметуваше на каса. Владата очекува мерката да го ублажи финансискиот товар на родителите во пресрет на новата учебна година. Според грубите проценки едно семејство би заштедило околу 50 евра.
