Антикорупциската комисија за локалните избори нема да остане обезглавена. Кормилото во раце го зема Цвета Ритовска која на денешната седница едногласно беше избрана за заменик претседател на комисијата. Нејзиниот мандат започнува од 21 –ви – месецов и треба да трае во наредните шест месеци односно се додека Собранието не изгласа претседателка.
Додека антикорупционерите бираа шефица, во Собранието истече рокот на огласот за пријавување на кандидати за претседател на Државната комисија за спречување на корупција.
Парламентот, пред два дена ја запре постапката за избор на првата антикорупционерка поради претстојните локални избори, се до 3 ноември годинава. Во Собранието беше и формирана комисија којашто по завршувањето на изборите ќе продолжи со селекција на кандидатите. По ова, ќе следува интервјуирање на квалификуваните на кои освен пратениците прашања ќе им поставуваат од новинарските здруженија и невладините организации.
Имено, Антикорупциската комисија остана без претседателка откако Татјана Димитровска си даде оставка откако Обвинителството ја обвини за две кривични дела, оддавање на службена тајна и фалсификување на сертификатот за безбедност којшто го поседувала. Според обвинителсттвото таа го хранела со информации поранешен директор на ТЕЦ Неготино, обвинет во случајот Адитив за злоупотреби при набавки на јаглен. На Димитровска ѝ се става на товар и дека незаконски го добила и сертификатот за класифицирани информации, откако преку службениот телефон му испратила пристапни податоци на ревизор во Државниот завод за ревизија, кој во нејзино име го положил тестот за безбедносна обука.
Татјана Димитровска пред да биде избрана за претседателка на Антикорупциска, долги години беше ревизор во Државниот завод за ревизија.
