На пациентите со механичка потпора на срце, деновите од животот им се бројат, секој ден велат и гледаме на смртта во очи. Пумпите кои кај 20-тината пациенти ја заменуваат работата на срцето, откажуваат и се во критична состојба. Бројот на пациенти впишани во националната листа за трансплантација се зголемува, најмладиот пациент е девојка на 29-годишна возраст. Додека чекаа трансплантација, некои веќе починаа, животот буквално ни зависи од батерии и 5 метри кабел – укажуваат од здружението “Храбро срце”. Крајно време е, велат, националниот тим за трансплантација да се консолидира и нашите врвни кардиохирурзи да ја направат првата операција за замена на вештачка пумпа со срце од донор.
“Доколку веќе крајно не може да се направи ништо за скоро време во државава, да се размислува за упатување кон странство да се решат нашите проблеми затоа што овие уреди кои што се ставени на нас како мост до трансплантација во светот се прифатени како уреди кои што се користат 3 месеци, најмногу една година. Ние повеќето пациенти од Македонија ги носиме повеќе од 5 години, некои и 6, и нашите организми се крајно исцрпени” – вели Претседателот на здружението “Храбро срце”, Васко Јолески.
Лоцирајќи ги проблемите, директорот на Фондот за здравство, Клековски, уверува дека националниот координатор за трансплантација работи напорно.
“Проблемот е и со наоѓање на орган, бидејќи во основа не сме членки на Евротрансплант, немаме можност да разменуваме органи во поширока мрежа, листата на чекање е долга и значителна и таму е вртење во круг. За да влеземе во Евротрансплант треба да имаме одреден број на трансплантации, а ние не стигаме до тоа посакувано ниво” – вели Сашо Клековски, директор на Фонд за здравство.
Пациентите со механичка потпора на срце молат, на следното ревидирање на позитивната листа на лекови да се стави за нив толку потребниот лек Ентресто, кој лани го регистрираше Агенцијата за лекови Малмед. Пациентите сега сами се снаоѓаат само за да дојдат до лекот кој кај нас чини околу 7.000 денари.
Инаку, стотина лица во Македонија со години чекаат за трансплантација и на други органи. Дваесеттина лица се на листата за трансплантација на срце, петнаесеттина за црн дроб, а дури 47 за бубрег, најмладите од нив се на 16, односно 17-годишна возраст.
