А независните кандидати за градоначалници и советници се во дилема – дали и како ќе можат да се кандидираат или да настапат на претстојните локални избори.
По одлуката на Уставниот суд да ја укине одредбата од Изборниот законик од 2024 година со која се крена цензусот за собирање потписи, сега е создаден вакуум за тоа колку потписи се потребни за кандидатура. Имено, судот не го поништи спорниот член, со што на сила ќе останеше стариот, туку го укина – со што практично сега во Изборниот законик воопшто не постои одредба за собирање потписи.
Независните листи имаат законско право, предвидено со посебна законска одредба од член 60 од Изборниот законик, да поднесуваат листи на кандидати, но одредбите кои ги регулираат условите во делот на потребните потписи се укинати, така што тие во овој момент не се предвидени и регулирани. Така што, ако Собранието во меѓувреме не усвои нови измени на законот, можно е независните воопшто да немаат право да се кандидираат.
Имајќи го ова в предвид, дел од независните организации одржаа средба со претседателката Гордана Сиљановска-Давкова и со претставници од политичките партии, но засега решение нема на повидок.
