Тешка трагедија ја потресе синоќа Прилеп – две лица, татко и малолетен син, се убиени, а сторителот на двојното убиство извршил самоубиство. Според првичните информации од истрагата, мотивот е семејна расправија поврзана со имотни недоразбирања.
Како што соопшти јавниот обвинител Стевчо Биноски, 63-годишен прилепчанец, во својата куќа на улицата „Стеван Апостолоски“, прво ги застрелал својот 43-годишен внук од сестра и неговиот 12-годишен син, а потоа си го одзел животот.
– Таткото и детето дошле во домот на вујкото околу 15 до 16 часот. Според досегашните сознанија, вујкото претходно му ја препишал куќата на внукот. Не е познато што се случувало во часовите потоа, но околу 22 часот соседите пријавиле пукање, рече обвинителот Биноски.
Загрижена од долгото отсуство на сопругот и детето, сопругата на убиениот пријавила случај во полиција. Екипата на МВР пристигнала на местото околу 22 часот, но при обид да влезе во куќата, напаѓачот активирал рачна бомба која делумно експлодирала – без да предизвика повреди.
Полицијата ја ангажирала специјалната единица „Тигар“, која нешто по полноќ влегла во куќата и го пронашла телата на тројцата мртви.
– Наредена е обдукција на телата. Станува збор за тешка семејна трагедија која остави шок и неверување кај прилепчани, изјави обвинителот Биноски.
Истрагата продолжува, а МВР работи на расветлување на сите околности поврзани со трагичниот настан.
