Доналд Трамп објави дека Израел ги прифатил „неопходните услови“ од 60-дневно примирје во Газа, без да ги открие деталите.
„За време на предложениот договор, ќе работиме со сите страни да се стави крај на војната. Катар и Египет, кои напорно работеа за да се постигне мир, ќе го испорачаат финалниот предлог. Се надевам дека Хамас ќе го прифати овој договор, зашто нема да станува подобро, само ќе биде полошо“, напиша Трамп на социјалните мрежи.
Израелскиот амбасадор во Обединетите нации, Дени Данон, кажа дека Израел е апсолутно спремен за примирје, но не знае дали Хамас ќе ги прифати условите од предложениот договор.
Трамп оваа недела ќе се сретне со Бенјамин Нетанјаху и најави дека ќе биде многу цврст со него.
„Навистина верувам дека Нетанјаху сака да завршат непријателствата во Газа. Мислам дека ќе имаме договор оваа недела“, рече Трамп.
Околу 50 израелски заложници и натаму се во Газа, но се верува дека само дваесетина се живи. Израел претходно кажа дека конфликтот може да заврши само ако Хамас целосно се растури. Хамас, пак, долго време бара постојано примирје и целосно повлекување на Израел од Газа.
