Руската армија ја презеде контролата врз целата територија на Луганската Народна Република, соопшти локалниот гувернер, Леонид Пашечник.
„Само пред два дена пристигна извештај дека територијата на Луганската Народна Република е целосно ослободена, 100 проценти“, изјави Пашечник.
Руското Министерство за одбрана досега нема издадено официјално соопштение во врска со тврдењето на гувернерот на ЛНР. Руската армија ги освои двата најголеми градови во регионот кои беа под украинска контрола – Северодоњецк и Лисичанск – за време на летната офанзива во 2022 година. Набргу потоа ја презеде контролата и врз нивната околина, а фронтот во ЛНР оттогаш речиси не се менува.
Украинската војска сè уште контролираше околу 100 квадратни километри на северозападот од ЛНР, вклучувајќи појас земјиште северно од градот Макеевка, каде што имаше неколку села – сега напуштени и уништени. Инаку, Луганската Народна Република е самопрогласена формација на источниот дел од Украина, која настана по вооружениот сепаратистички бунт во Донбас во 2014 година.
