Македонија има уникатна позиција и мора да ги развива коридорите 8 и 10Д. Земјава со помош на Франција ќе продолжи да се развива инфраструктурно. Вицепремиерот и министер за транспорт Александар Николоски оствари средба со министерот за транспорт и инфраструктура на Франција, Филип Табаро. Порача дека во иднина ќе се продлабочува соработката во делот на желзницата, авиосообраќајот и автопатиштата.
-Во делот на Железницата ги презентирав нашите планови за развој на двата коридори 10 и 8. Македонија има уникатна позиција каде двата коридори се пресекуваат источно од Скопје и двата треба да ги развиваме. Во однос на коридор 8 кој е од стратешко значење за НАТО, зборувавме што можеме да направиме за да се доврши источниот дел од пругата но исто така да се развие и западниот дел од пругата, секако да се поврземе и со Италија, Албанија и Бугарија и да ги поврземе Јонското и Јадранското море со Црното море, изјави Николоски.
Табаро изрази задоволство од средбата со Николоски, порачувајќи дека имале важен состанок за односите меѓу двете земји во областа на транспортот. Вели двете држави веќе имаат одлична соработка во воздушниот сообраќај.
-Веќе постои соработка од областа на воздушниот сообраќај со компанијата која управува со аеродромите во вашата земја и соработката е одлична. Соработката е добра и од областа на цивилното воздухопловство и истата постојано се унапредува. Целта на денешната средба е да се соработува и на други проекти пред се од областа на железничкиот сообраќај, затоа што постојат француски компании кои се развиени и напреднати, изјави Табаро.
Николоски кажа и дека имал средба со 11 најголеми француски компании, кои се добредојдени да инвестираат во Македонија.
Матеја Петровски
