Зоран Давитков службеникот од Народна банка кој е осомничен дека наводно го зел ранецот со пиштолот на Љупчо Палевски негира вина и вмешаност во грозоморниот случај за убиствата на Вања Ѓорчевска и велешанецот Панче Жежовски, дознава Алфа од судски извори. Тој пред судија на претходна постапка тврдел дека не се вистинити обвинувањата од страна на осомничениот Велибор Манев кој сведочеше за телефонскиот повик и наредбата од Палчо. Зоран Давитков и неговиот син, четири години биле членови на партијата на „Десна“.
Истражители на МВР и Обвинителство пред три дена влегле кај осомничениот дома и во канцеларијата во Народна Банка. Претресувале и барале докази дали Давитков од седиштето на партијата Десна го зел синиот ранец и се ослободил од пиштолот и моторолите.
Зоран Давитков остана без пасош и редовно треба да се јавува кај надлежен во Кривичниот суд, додека обвинителството истражува дали има вистина во зборовите на Манев.
Истрага против него беше отворена откако во судница второобвинетиот Велибор Манев сведочеше дека Палевски му се јавил и му рекол да му се јави на Зоран, за „пакетот“ што го зел од канцеларијата за да го отстрани од кај него, да го фрли или да го уништи, за да не може никој да го најде.
Интересно е тоа што Манев ова не го кажува за првпат, а дури по еден месец откако го повтори истото, Обвинителството реагираше. На 16 мај, во судница, го кажа истото, но не спомена име. Тогаш новинарите прашуваа, а една од обвинителките беше зачудена од каде им се тие информации, заборавајќи дека токму тие, будно го следеа целиот судски процес.
Лавина реакции во јавноста предизвика одлуката на Обвинителството да бара да му се одземе пасошот на Давитков, наместо тој да оди во притвор. Обвинителството за него води посебна истрага. Судскиот случај за двојното убиство од кое се згрози не само македонската јавности, туку целиот регион финишираше.На 25 јуни, во среда, Кривичниот суд ќе ја објави пресудата. Петмината осомничени се соочуваат со доживотна робија. Неизвесно е дали ќе биде осуден и таткото на Вања, за кого обвинителството тврди дека соработувал со обвинетите.
