Почна лекувањето во одмарилиштето на „Пониква“ на настраданите од кобниот пожар што се случи во дискотеката „Пулс“. 46 луѓе на кои им е потребно лекување од изгореници, се дел од првата група којашто две недели ќе се лекува во одмарилиштето. Тие ќе добијат физикална и физиотерапија, ќе вежбаат јога, набавени се веќе и специјалните креми за изгорена кожа, а обучен тим на медицинари ќе се грижат за нив. Директорката на Општата боолница Кочани, информира дека во следен период, во неколку групи, пациентите ќе можат во одмаралиштето да го продолжат лекувањето на раните.
58 пациенти веќе носат компресивна облека. Медицинарите забележале значителни подобрувања кај пациентите. Како што вчера беше објавено, дополнително, се вршат подготовките за изработка на компресивна облека за уште 14 лица, со помош на која ќе можат да ги изведуваат неопходните физикални вежби и ќе имаат заштитен фактор килу нивните лузни.
Лекарите ги советуваат пациентите стриктно да ги почитуваат препораките за носење на компресивната облека во поголем дел од денот, најмалку 23 часа. Притоа, во наредните две години, облеката треба да се менува на секои шест месеци, а Фондот за здравствено осигурување ќе обезбеди два сета по пациент.
Стигнати биле и лепенки што пациентите долго ги барале, првата пристигната тура броела 95 лепенки.
Веќе биле потпишани договори со ГОБ „8 Септември“ за пулмолози, се работело на списоци со пациенти на кои им е неопходен преглед кај пулмолог. Директорката на кочанската болница нагласи дека ќе се направи список на потреби, распоред за пулмолошки прегледи кои што ќе се одвиваат во Општата болница – Кочани.
Истовремено, Кочани добива системски пристап во здравството и подобри услови за пациентите. Во моментов се одвива реконструкција на просторот на физикална медицина во кочанската болница, со вкупна површина од 350 квадратни метри. Рокот за завршување на работите е предвиден во наредните 3-4 недели.
