Бизнисот со големи очекувања од проектот брза пруга од српската до грчката граница. Компаниите се надеваат на побрз транспорт на стоки не само од и кон Солунското пристаниште, туку и кон централно европските држави. Карго сообраќајот долж пругата ќе се одвива со 120 километри на час, а патничкиот со 160 километри на час. Тоа значи дека побрзо ќе доаѓаат суровините и репороматеријалите во Македонија, но и полесно ќе се извезуваат готови производи во странство. Особено „тријат“ раце градежниците. Тие веќе побараа од Владата, да учествуваат со 70% во изградбата на брзата пруга. За нив е клучно домашната оператива да биде вклучена во проектите, и да не се повторуваат грешките од минатото кога домашните компании имаа многу мал ангажман во стратешките проекти. Апелираат надлежните да бидат внимателни околу условите под кои ќе се гради и ќе се ангажираат домашните градежни фирми.
Аналитичарите очекуваат кредитот кој ќе се земе за да се изгради брзата пруга, да биде со поволни услови. Фактот што британската Експорт банка гарантира за заемот, а Британија како држава има највисок кредитен рејтинг, треба да и обезбеди на Македонија конкурентна каматна стапка, пониска од досегашните задолжувања.
Проектот кој „тежи“ 1,9 милијарди евра и треба да го забрза транспортот меѓу српската и грчката граница е круцијален за поголемо раздвижување на македонската економија. Градежништвото треба да оствари уште поголем раст од досегашниот. Овој сектор со години беше во криза, за конечно на стартот на годинава да доживее поголема експанзија. Во растот на економијата во првите три месеци годинава, градежништвото има најголемо влијание со зголемување на активностите за 7%.
