Се стравува дека нема преживеани во авионската несреќа која се случи изутрината во индискиот град Ахмедабад. Боингот 787 дримлајнер во кој имаше 242 патници и членови на екипажот кој требаше да лета за Лондон, експлодираше кусо по полетувањето. Спасувачките екипи се уште се на терен и трагаат меѓу остатоците. Локалните власти првенствено изразија сочуство до семејствата и потенцираа дека информации околу починатите ќе бидат достапни во текот на денот.
„Она што се случи во Ахмедабад е многу трагична несреќа. Изгубивме многу луѓе. Им изразуваме најдлабоко сочувство на сите оние кои ги загубија своите најблиски. Разбирам дека има и неколку странци, тие информации ќе ги добиете од надлежните оддели, Министерството за цивилно воздухопловство, Ер Индија и други“ вели Рандхир Џаисвал, портпарол на министерството за надворешни работи на Индија
Во авионот имало 169 индиски државјани, 53 Британци, 7 Португалци и еден Канаѓанец. Поради ова Министерството за надворешни работи на Обединетото Кралство формирал кризни тимови во британскиот и индискиот главен град за да им помогнат на погодените во несреќата.
„Знаеме дека британски државјани беа во авионот и можам да потврдам дека Министерство за надворешни работи на Велика Британија итно соработува со локалните власти за поддршка на британските државјани и нивните семејства и формираше кризен тим и во Делхи и во Лондон“ вели Дејвид Лами, министер за надворепни работи на Велика Британија
Според веб-страницата на Боинг, авионот што се урна беше Боинг 787 Дримлајнер, двомоторен широк трупен авион. Моделот има направено повеќе од пет милиони патувања во 14-те години од својот прв патнички лет. Оваа несреќа повторно ги става во фокус безбедносните проблеми на „Боинг“ кој со години е под лупа поради бројни технички и производствени грешки.
Давид Крстевски
