Владата полека но сигурно ги исполнува ветувањата. Напредок во економијата, здравството, образованието – една година по формирањето на Владата – е забележлив, но високите очекувања на граѓаните и понатаму остануваат. Годишниот извештај од мониторингот на Finance thik за владините ветувања за првата година покажа дека дел од целите и ветувањата се веќе ставени во функција, некои се во тек, а трети чекаат да бидат реализирани.
Податоците покажуваат дека 18 мерки се целосно исполнети, додека 51 се во процес на реализација. Најголем напредок е забележлив во образованието.
„Најголем напредок има во секторот образование, каде што има 24% од мерките исполнетост и дополнително 70% кои што се во насока на исполнување“, изјави Благица Петрески од Finance think“.
Покрај образованието во рамката за 2024–2028 година, следени се 139 ветувања областите на социоекономските политики, здравството, младите и родова еднаквост. Во социоекономскиот сегмент, реализацијата е нешто послаба. Во здравството, од 30 ветувања, приоритет се дигитализацијата и реконструкциите, но недостигот на кадар и старата опрема остануваат главен проблем.
„Она што останува предизвик во наредниот период е секако длабинските реформи во примарното здравство и во другите сектори, како што е и во регионализацијата на болниците, дигиталната трансформација на здравствениот систем и секако недостатокот на здравствени работници“, изјави Кирил Солески од АДИЦД МЛД.
Истражувањето укажува дека граѓаните имаат високи очекувања – дури 80% очекуваат секое дете да има пристап до градинка, а 77% – нови работни места. Домот, образованието и стабилна економија се во фокусот на нивните барања.
