Ексдиректорот Нино Васев заедно со тројцата лекари онколози седнуваат на обвинителна клупа. Кривичниот суд во целост го прифати обвинението за несоодветните терапии кои им се давале на онколошките пациенти со и онака кревко здравје. Одбраната имала жалби за поднесениот обвинителен акт во кој лекарите се товарат за тешки дела против здравјето на луѓето и несовесно лекување болни, но судиите не им ги прифатиле.
„Советот за оцена на обвинител акт, постапувајќи по обвинението со К – ООА 128/25 за случајот, во јавноста познат, како „ Онкологија “, поднесен 22.05.2025 година, донесе решение со кое приговорот на одбраната се одбива, а актот се одобрува“, велат од Основен кривичен суд Скопје.
Според обвинителите, Васев како лекар, заедно со уште тројца онколози, на пациентите им давале погрешно дозирана терапија, а знаеле дека немаат никаква корист од неа и дополнително им го влошувале здравјето. Вештачењата од Словенија покажале дека кај најмалку 29 пациенти е утврден несоодветен третман со погрешно дозирање и отстапки од онколошките протоколи, за што на Васев му помагала колешка од одделето за тумори на дојка. Експерти пак од Србија констатирале погрешно лечење кај 18 пациенти. Другите двајца лекари онколози биле од одделот за бели дробови, и се товарта за давање терапија без медицинска основа.
Во меѓувреме, Обвинителството се сретна со онколошките пациенти и семејствата на починатите од рак кои не го дочекаа крајот на истрагата, а кај кои било утврдено пропуст во лекувањето и им укажале на нивните права како оштетени.
Поранешниот директор Васев е обвинет и за финансиските злоупотреби при набавките на онколошката терапија, заедно со поранешниот организациски директор Нехат Нухи.
