Еврокомесарката за проширување Марта Кос се нуди да посредува меѓу Македонија и Бугарија, со цел деблокирање на европскиот пат на државава. Таа потенцираше и дека Европската комисија разгледува начини за поедноставување на процедурите за пристап во ЕУ, со цел да се избегне ризикот билатералните спорови да го забават процесот.
-Бугарија и Северна Македонија треба да почнат да разговараат интензивно и да најдат решение за ова билатерално прашање и јас стојам на располагање како олеснувач ако е потребно. За мене проширувањето е многу повеќе од само проширување. Туку станува збор за обединување на Европа. Тоа не е само морална неопходност, туку јасен услов за посилна и побезбедна Европа. Проширувањето во овој контекст оди подалеку од традиционалниот поглед и станува средство за обединување на Европа околу заеднички вредности и принципи, изјави Кос.
Во меѓувреме, Европскиот Парламент треба гласа за извештајот за напредокот на Македонија, со кој со официјален документ ќе се зацементира постоењето на македонскиот идентитет и јазик. Сепак амандмани на овој текст поднесоа бугарските европратеници кои бараат да стои „сегашна“ нација. Претседателката Гордана Сиљановска – Давкова смета вакво нешто е навредливо за државава и спротивно на европските вредности.
-Искрено не очекував во 21-от век во Европскиот Парламент да прочитам или да слушнам некои амандмани, замислете во 21-от век да оспорувате нечиј идентитет, тоа е непознат феномен. Тоа е нешто шокантном, изјави Сиљановска- Давкова.
Сиљановска – Давкова очекува дека извештајот ќе биде поддржан од европратениците.
-Очекувам значи да биде поддржана, зошто во спротивно, зошто во спротивно тоа многу лошо ќе зборува за демократскиот капацитет на Европпскиот Парламент, изјави Сиљановска- Давкова.
Поддршка од европратениците очекува и премиерот Христијан Мицкоски. Вели повеќе владини функционери веќе разговарале со цел изгласување на извештајот.
Во период кога македонскиот идентет и јазик се оспорувани од Бугарија, извстувачот во Европскиот Парламент, Томас Вајц јасно изрази поддршка, велејќи дека Македонците се Македонци, а македонскиот јазик е македонски. Побара конструктивност и поддршка од европратениците за извештајот за напредокот на земјава, за што се очекува да се расправа оваа недела во Брисел.
Очигледно, изненадена од острата реторика на македонските власти, Бугарија пред неколку дена донесе Декларација во Парламентот со која се повикува Македонија да ги исполни условите прифатени со францускиот предлог пред три години. За владата уставни измени се можни само со одложено дејство, кога ќе добиеме гаранции дека Бугарија веќе нема да го блокира патот до полноправно члество, поради билатерални прашања.
Матеја Петровски
