По повеќе од две децении бегство полицијата го уапси Хамди Бајрамовски, познат на јавноста како командант Бреза. Од МВР велат дека 43-годишниот Бреза бил лоциран на 2 јуни на подрачјето Гази Баба по што веднаш бил приведен. Против него имало неколку активни потерници за вкупна затворска казна од 11 години – пет години за кривично дело разбојништво и уште шест години за неовластено производство и трговија со дрога.
„Тој бил баран по потерници за издржување казна затвор од пет години за сторено кривично дело „разбојништво“ по член 237 од Кривичниот законик и затворска казна од шест години за сторено кривично дело, неовластено производство и пуштање во промет наркотични дроги, психотропни супстанци и прекурзори“, велат од МВР.
По приведувањето, веднаш бил спроведен во затворот во Шутка, каде ќе започне со издржување на казната. Бреза со години се наоѓаше на листата на најбарани лица и против него беше распишана меѓународна потерница за низа тешки кривични дела.
Неговото име на јавноста и стана познато во 2005 година, кога при претрес во неговиот дом во скопското село Брест, беа пронајдени огромна количина оружје, минофрлачи, гранати, униформи и над 300.000 куршуми. Полицијата тогаш не успеа да го најде Бреза, но ги приведе неговиот татко и брат. Пред истражните органи тие признаа дека оружјето е на Бреза, а полициската акција следеше по апсењето на криминалецот Сулејман Цури, кој на полицијата им ја посочил локацијата на скриеното оружје.
Дополнително, Бајрамовски се поврзува и со други тешки кривични дела, вклучувајќи незаконско оружје, насилство и нарушување на јавниот ред и мир, за кои се водат активни истраги.
