Премиерот Христијан Мицкоски ги повика надлежните институции што поскоро да постапат за наводните чаирски дивоградби за кои обвинува актуелната градоначалничка Арсовска и за заканите по живот коишто биле упатени на нејзина адреса.
Доказите од страна на градоначалничката веќе се доставени до Обвинителството, па Мицкоски вели да се почека обвинителите да сработат и доколку се постапувало незаконски, како што вели, нема дилема дека законот си важи исто за сите. Тој ја охрабри градоначалничката да ги пријави заканите во МВР, а полицијата веднаш да постапи.
Мицкоски се согласува со својот коалиционен партнер Изет Меџити и актуелниот градоначалник на Чаир, Висар Ганиру, дека Арсовска е искористена како оружје од страна на ДУИ и е дел од сценарио за дестабилизација на државата.
Градоначалникот на Чаир е во центарот на вниманието деновиве поради обвинувањата од страна на градоначалничката на Скопје, за нелегално градење во неговата општина. Тој на својот Фејсбук профил напиша дека со директна соработка, Арсовска, Димитар Апасиев и Блерим Беџети го држат главниот град во заложништво и ја казнуваат Општина Чаир.
Инаку, градоначалничката Арсовска вчера поденесе кривична пријава и докази за наводните злоупотреби од страна на Висар Ганиу откако Обвинителството предходно ја повика да ги достави. Според Арсовска, чаирскиот градоначалник учествувал во коруптивни зделки за издавање градежни дозволи за згради за кои Градот Скопје дал негативно мислење.
Случајно или не, на само неколку месеци пред локалните избори, мајката на градот реши да истражува корупција и незаконско работење во општините. Засега познато е дека таа нема да се кандидира за втор мандат.
Од владејачката ВМРО ДПМНЕ велат дека партијата на средината на јули ќе го соопшти името на новиот кандидат. Без разлика кој ќе биде, Мицкоски уверува дека според анкетите, нивниот кандидат сигурно ќе биде подобра опција и избор од понудата на опозицијата.
