Собранието на Македонија на 3 јуни ќе расправа и гласа за предлогот на претседателката Гордана Сиљановска Давкова за нов гувернер на Народната банка. Од кабинетот на претседателката информираа дека при изборот се водела од критериуми како стручност, компетентност, интегритет и дигнитет. Според нив, одлуката не била лесна, имајќи го предвид високиот квалитет на сите кандидати. Во конкуренција беше и досегашната гувернерка Анита Ангеловска-Бежоска, чиј мандат истече денеска, како и поранешниот министер за финансии Зоран Ставревски.
Предлогот на Сиљановска Давкова вчера официјално пристигна во Собранието, а со неговото отворање во архивата утрово, започна и формалната процедура за избор на гувернер.
Трајко Славески е професор на Економскиот факултет при УКИМ. Во периодот од 1999 до 2000 година тој беше министер за развој. Од ноември 2000 до септември 2002 година ја вршел функцијата советник на министерот за финансии и национален координатор за подготовка на „Националната стратегија за намалување на сиромаштијата“. Во мај 2005 година бил избран за потпретседател на ВМРО-ДПМНЕ, а од април 2005 до август 2006 година бил член на Советот на Град Скопје. Во август 2006 година стана министер за финансии, а на функцијата остана до јули
2009 година. Во моментов е на функцијата претседател на Советот на Град Скопје
За неговиот избор ќе бидат потребни најмалку 61 пратенички глас.
