Фридрих Мерц не успеа да стане нов канцелар на Германија. Владината коалиција не успеа да обезбеди мнозинство од 316 гласа. Лидерот на ЦДУ/ЦСУ доби поддршка од 310 пратеници во германскиот Бундестаг, а 307 гласаа против во првиот круг.
„Број на членови 630, дадени гласови 621, неважечки гласачки ливчиња едно. 310 членови гласаа „ЗА“, 307 гласаа „ПРОТИВ“, и тројца воздржани. Пратеникот Фридрих Мерц не го доби потребното мнозинство од најмалку 316 гласови. Во согласност со член 63 (2) од Основниот закон, тој не е избран за канцелар на Германија“ вели Јулија Клокнер, претседателка на германскиот Бундестаг
Пратениците во германскиот парламент имаат следни 14 дена да изберат канцелар. Во секој случај, политичката криза во која се најде оваа земја која има најмоќен глас во Европа за прв пат во историјата, очекувано ќе се одрази врз движењата во Европската Унија. Мерц предупредува дека германската демократија е во слободен пад.
„Сега не е време за еуфорија. Столбовите што ги земавме здраво за готово во последните години и децении се распаѓаат околу нас. Довербата во нашата демократија е на најниско ниво во повоената историја на нашата земја“ вели Фридрих Мерц, лидер на ЦДУ/ЦСУ
По неуспешниот обид на Мерц за иден канцелар, од крајнодесничарската „Алтернатива за Германија“ на чело со Алис Вајдел, почнаа веднаш со обвинувања.
„Фактот дека личности како Фридрих Мерц кој привлече внимание со кршење на сите свои предизборни ветувања, воопшто се споменува на изборите за канцелар, многу зборува за политичката состојба на нашата земја“ вели Алис Вајдел, лидер на Алтернатива за Германија
За прв пат во историјата на Германија се случува да не се избере канцелар на државата во првиот круг. На последните избори кој се случија годинава, демохристијаните освоија 208 пратенички места, а зад нив со 152 пратеници беа крајнодесната АфД. Со 30-тина пратенички места помалку беа социјалдемократите на последните избори, со што се покажаа со најслаб резултат.
Давид Крстевски
