Обсе може да помогне во забрзувањето на македонскиот, но и западнобалканскиот пат во евроинтеграциите преку унапредување на малцинските права, согласно фундаменталните документи за малцинствата. Ова го истакна претседателката Гордана Сиљановска-Давкова на средбата со високиот комесар за национални малцинства на ОБСЕ, Кристоф Камп, кој првпат е во посета на земјава по преземањето на функцијата во декември лани.
Високиот комесар на ОБСЕ изразил подготвеност за експертска помош во креирањето или иновирањето на правната рамка, доколку за тоа има интерес и барање од македонските институции. Понудил експертиза на постојната национална регулатива за заштита на малцинските права, како и на нејзината имплементација.
Претседателката ја истакнала усогласеноста на македонската легислатива за малцинствата со највисоките стандарди за малцинските права, но и потребата од поголема грижа за помалите малцинства.
Во оваа смисла, Сиљановска-Давкова и Камп ја истакнале важноста на добрососедските и пријателски односи, чиј важен фактор е почитувањето на малцинските права.
