Алијанса за Албанците ќе ја напушти Владата ако премиерот Мицкоски смета дека тие не се потребни. Министерот за здравство и лидер на Алијанса за Албанците, Арбен Таравари, денеска од Куманово повтори дека не смета оти напуштањето на коалицијата „Вреди“ за локалните избори е причина за излегување од Владата. Но, доколку премиерот, како единствено лице што ја формира Владата, одлучи дека Алијанса за Албанците не е потребна, вели дека нема да имаат проблем со тоа.
Од Кабинетот на премиерот синоќа соопштија дека стабилноста на Владата останува непроменета, и покрај шпекулациите за можни тензии меѓу коалициските партнери. Оттаму потенцираат дека формална средба со Алијанса за Албанците и со министерот за здравство се очекува по 1 мај, при што ќе се разговара за идниот ангажман на партијата во извршната власт.
