Во меѓувреме, ДУИ си најде нова причина да обвинува за албанофобија. Сега им сметало тоа што на неколку веб-страници на некои од министерствата немало доволно содржини на албански јазик.
„Недостигот на содржина на албански јазик во министерствата за енергетика, транспорт, внатрешни работи и други институции не само што претставува кршење на Законот за употреба на јазиците, туку и намерно исклучување на албанските граѓани од пристап до информации од јавен карактер“, велат од ДУИ. Тврдат дека во некои случаи задржани се само старите двојазични формати од претходната влада, но суштинските содржини, документите и клучните информации се објавуваат исклучиво на македонски јазик.
„Станува збор за опасен тренд што оди подалеку од техничка негрижа – ова е институционална политика која го ограничува практичното користење на албанскиот јазик и ги поткопува темелите на меѓуетничката еднаквост во државата“, стои во соопштението.
Покрај тоа, додаваат од ДУИ, овие случувања доаѓаат во време кога се прават обиди да се доведат во прашање клучните одредби од Законот за јазиците во Уставниот суд.
