Посветени сме целосно и сметам дека се издвојуваме во однос на реформската агенда, имаме силна поддршка од Луксембург, но и генерално од земјите од ЕУ – вели министерот за надворешни работи и надворешна трговија Тимчо Муцунски по средбата со неговиот луксембуршки колега Гзавие Бетел.
На средбата станало збор за поддршката која ја дава Луксембург на евроинтегративниот пат на Македонија, и сите предизвици со кои се соочува земјава.
Од колегата Бетел, добив потврда дека тие ќе останат наш посветен партнер, не само политички, туку постои и одреден потенцијал кој што го гледаме за продлабочување на соработката во економско трговските релации. Ние сме партнери и во НАТО Алијансата, и имавме продуктивна средба, изјави министерот Муцунски.
Тој вчера учествуваше на неформалниот состанок на Советот за надворешни работи на ЕУ кој се одржа во Луксембург а имаше и средба со еврокомесарката за проширување, Марта Кос.
Испрати порака дека Македонија е посветена на реформската агенда, но исто така и преку проактивната дипломатија се бори да изнајде решение за откочување на процесот.
Очекуваме разбирање од земјите членки, за огромниот број отстапки кои Македонија ги има направено изминатите три децении. Потребно е да се најде начин, како да ги започнеме пристапните преговори. А секако, покрај овој дијалог што го имаме со европските институции, ние постојано сме во дијалог и со земјите членки, рече Муцунски.
На средбата се разговарало за актуелниот статус на македонското ЕУ-досие, заемната посветеност за надминување на актуелните предизвици и неопходноста од забрзување на евроинтеграцискиот процес.
Заеднички беше потврдена посветеноста на Владата кон реформската агенда и целосната усогласеност со Заедничката надворешна и безбедносна политика на Унијата, што претставува силна потврда за стратешката ориентација на државата и трасира кредибилен и веродостоен пат кон полноправно членство во ЕУ, соопшти Миистерството за надворешни работи и надворешна трговија.
