Интензивната истрага за трагедијата во Кочани и големиот број на докази може да ја прошири истрагата со нови осомничени луѓе, но во оваа фаза од постапувањето министерот Панче Тошковски не може да открие детали. Тој во гостувањето на телевизија Алфа посочи дека 11 обвинители заедно со истражители на МВР секојдневно собираат и анализираат докази, но и сослушуваат сведоци. Вели дека има разлика како се постапува сега во однос на претходните години затоа што за трите поголеми случаи како Ласкарци, Модуларната болница во Тетово и запалениот автобус во Бугарија немало поднесено ниту една пријава од страна на МВР, ниту пак бил извршен претрес за разлика од сегашните кривични пријави што се поднесени за случајот во Кочани.
Во меѓувреме од судот во Кочани информираа дека до нив стигнале жалби од осомничени и во моментов се разгледуваат. Засега е неизвесно кој ќе ја суди трагедијата во Кочани бидејќи сите судии кои постапувале во претходна постапка, согласно законот, нема да можат да судат.
