Судскиот совет пресече – Ељведин Ферати донел пресуда како што треба – не смеел да пресуди повеќе од две години за возачот кој ја прегази 22 годишната Теодора. Тричлената комисија во Судскиот совет не најде погрешно постапување на ниту еден од трите судови кои одлучувале. Последно, судијата Ферати согласно одлуките кои претходно ги донеле гостиварска апелација и Врховниот суд, не смеел да ја зголеми казната на штета на Менсур Пајазити во однос на квалификацијата на делото и на кривичната санкција.
Работите, според образложението на Судски совет би биле поинакви, ако на првостепената пресуда кога возачот Менсур Пајазити беше осуден на три години и шест месеци, се жалело и Обвинителството. Тогаш, при повторување на постапката, судијата ќе можел да одреди и повисока казна. Но, не само што Основното обвинителство-Тетово немало жалба, туку Вишото јавно обвинителство, прво барало да му се потврди казната, а потоа се предомислило и барало пониска казна. И така била изречена последната санкцијата од две години затвор.
Претходно, сомнежи за политичко влијание, мито и корупција изрази семејството на смртно прегазената Теодора Ристовска, за пресудата која ја донесе судијата од тетовскиот суд Ферати. Тие со писмо до јавноста, изразија надеж дека Судскиот совет соодветно ќе реагира за две-годинишната затворска казна за шоферот Менсур Пајазити кој на пешачки премин ја прегази 22 годишната Теодора. Децидни се дека до крај ќе ја бараат правдата за нивната сестра и ќерка и се заблагодарија на медиумите и премиер Мицкоски за заинтерисираноста за случајот.
Семејството прашува и зошто од иницијативата „Кој е следен“, не се заинтересирале за нивниот случај, иако, како што велат, се претставуваат како борци против корумпираниот систем.
