Финансиската полиција поднесе кривични пријави против управителот и фирмата „Пин Петрол“ од Куманово, која јавноста ја поврзува со поранешниот министер за внатрешни работи Оливер Спасовски, а сега координатор на пратеничката група на СДСМ.
Под истрага се и две службенички – една во Пошта и друга во Јавното претпријатие за државни патишта. „Пин Петрол“, која освен бензинска пумпа поседува и станица за технички преглед, во периодот од 2019 до 2024 година лажирала дека парите наменети за ЈПДП од регистрацијата на возилата се уплаќаат на државното претпријатие. Според соопштението од полицијата, во тоа помогнала второпријавената, Г.С.П., вработена во Македонски Пошти, која наместо да ги уплати парите на претпријатието, ги присвојувала, а налозите за уплата ги фалсификувала. Третопријавената, вработена во ЈПДП и надлежна за контрола, пропуштила да провери дали „Пин Петрол“ ги уплаќал законските давачки. Пријавените ќе одговараат за злоупотреба на должноста, проневера и несовесно работење, а со неуплаќањето на предвидената патна такса го оштетиле буџетот на ЈПДП во висина од 362 илјади евра. (П.А.)
