Во куќата на стравот, односно во Зоо-Скопје, угинаа две лами од редок вид, објави советникот од ВМРО-ДПМНЕ во Град Скопје, Стефан Кирков. Тој вели дека и за оваа катастрофа надлежните во зоолошката молчат, а според неговите неофицијални информации, ламиците починале викендов од туберкулоза.
„Како и дали се лекувани овие животни, кој ги лекувал и дали, ќе покаже патолошкиот наод и истрагата. Подолгo време укажувам и апелирам дека во Скопје ЗОО нема стручен ветеринар и дека ветеринар е човек кој до пред година дена беше аниматор за детски родендени,“ посочува Кирков во објава на социјалните мрежи и прашува „До кога? Ќе има ли одговорност? Што е следно и дали е време конечно да престане овој хорор??? Ги охрабрувам сите новинари, институции, друштва за заштита, да се позанимаваат со ова што ни се случува во скопската зоолошка градина,“ напиша Кирков.
За краток период во ЗОО-Скопје, угината е слоница, жирафа, монголски коњи, лемури, антилопи. Од најразвиената и најпосетената во регионот зоолошка градина, за неколку години, стана руиниран дом за егзотични животни. Очигледно, една од најстарите зоолошки во Европа ги преживува најтешките години од своето речиси 100-годишно постоење.
