Илон Маск, лично побарал од Доналд Трамп да ги повлече царините што ги објави минатата недела, објави „Вашингтон пост“. Повикувајќи се на два, неименувани извори, весникот наведува дека ова е најголемото несогласување досега меѓу извршниот директор на „Тесла“ и американскиот претседател. Апелот на Маск дојде откако Трамп објави основна царина од 10% за целиот увоз, со дополнителни зголемувања за десетици земји. Маск, кој го предводи американското министерство за ефикасност на владата, претходно повикуваше на укинување на царините меѓу САД и Европа. Компанијата на Маск „Тесла“ забележа голем пад на продажбата во последниот квартал, делумно поради негативната реакција на неговата улога во администрацијата на Трамп. Акциите на компанијата, вчера се затворија на 233 долари, што претставува намалување за повеќе од 42% од почетокот на годината.
