Општина Илинден и оваа година објави Јавен повик за субвенции за набавка на инвертер клими и соларни панели. Јавниот повик се спроведува во рамки на Програмата за финансиска поддршка на граѓаните за 2025 година, која овозможува еднократна парична помош за купување на инвертер клими или соларни панели за лица со постојано место на живеење на територијата на општина Илинден.
Општината ќе покрие 50% од цената на инвертер климата или соларниот панел, со максимален износ до 10.000 денари по производ. Целта на оваа програма, како што истакна градоначалникот Александар Георгиевски, е да се поттикнат домаќинствата да користат енергетски поефикасни и еколошки прифатливи инвертер клима уреди за затоплување на домовите.
Барањата ќе се разгледуваат по редослед на пристигнување, а правото на учество го имаат сите граѓани на општина Илинден кои ќе набават инвертер клима или соларен панел, почнувајќи од 07.04.2025 година, се до исцрпување на средствата предвидени за оваа намена.
