Премиерот Христијан Мицкоски во своето интервју за ТВ Алфа говореше за потребата од политичко единство во Македонија, особено во периоди на криза. Според него, иако има разлики со претседателот на СДСМ, Венко Филипче, важно е политичарите да испратат порака на обединување, особено кога станува збор за клучни прашања за земјата.
„Се побара средба, јас веднаш одговорив, но немаше конкретен план или конкретна реторика како што би било вообичаено, со чекори и конкретни решенија. Наместо тоа, побараа инклузивен процес. Јас како политичар и човек, сметам дека треба да привлекуваме од сите слоеви на општеството – интелектуалци, невладини организации и политички партии кои можат да помогнат во процесите“, изјави Мицкоски.
Тој нагласи дека важноста на политичкото единство и обединување во услови на емотивна и тешка состојба на населението е клучна. „Политичарите треба да испратат порака дека не се водат од ниски страсти и политиканство, туку дека може да покажат ширина и одговорност во комуникацијата со јавноста“, додаде Мицкоски. На крајот, тој остави на јавноста да процени дали неговата одлука за лидерска средба со Филипче беше правилна или не, но посочи дека во моменталната ситуација во Македонија таква средба е неопходна.
