Министерот за внатрешни работи, Панче Тошковски, во врска со случајот на уапсениот член на обезбедувањето на премиерот Христијан Мицкоски, кој е осомничен за кривично дело „оддавање службена тајна“, истакна дека МВР неселективно и бескомпромисно се бори против криминалците во своите редови.
„Многу кривични пријави се поднесени и во минатото против криминалците во редовите на МВР, а исто така постапено е и во овој случај. Одделот за внатрешна контрола, по добиени информации, извести надлежен јавен обвинител кој што ја одобрил акцијата и дал наредба за преземање на мерки истата вечер. По спроведувањето на акцијата, извршени се претреси кај полициски службеници и пронајдени се докази кои го потврдуваат стореното кривично дело“, изјави Тошковски.
Тој додаде дека македонските граѓани заслужуваат полиција која ќе ги штити, а не која ќе ги злоупотребува.
„Сакам да им порачам на сите недобронамерници и предавници во редовите на МВР дека ќе продолжиме неселективно и бескомпромисно да се бориме против криминалците. Македонските граѓани заслужуваат полиција која ќе ги штити, а не полиција која ќе ги рекетира“, нагласи Тошковски.
Во одговор на прашањето дали е вознемирен што овој случај потекнува од нивните редови, министерот изјави дека целото МВР е вознемирено.
„Сите во МВР се вознемирени кога ќе видат дека некој криминалец се прикривал со униформа, без разлика дали таа униформа е свечена, тактичка или униформа која ја носат припадниците на одделот за обезбедување на имот и лица“, истакна Тошковски.
Тој не сакаше да открие дополнителни детали од истрагата, но нагласи дека кога ќе имаат потребни информации, ќе ги споделат со јавноста.
Членот на обезбедувањето на премиерот Христијан Мицкоски, Ангел Сарамаков, беше уапсен и му беше одреден 30-дневен притвор. Сарамаков, кој е полицаец од 6-тата Управа на МВР, е осомничен за кривично дело „оддавање службена тајна“.
