Јавен обвинител од Основното јавно обвинителство Скопје поднесе Обвинителен предлог против 50-годишниот Зоран Јованов, (татко на Васил Јованов) за кривично дело – предизвикување општа опасност, согласно член 288 став 4 во врска со став 1 од Кривичниот законик.
Во текот на постапката, јавниот обвинител обезбеди докази кои потврдуваат дека обвинетиот, во периодот од 04.11.2022 до 30.01.2025 година, со општоопасно дејствие предизвикал опасност за животот и телото на луѓето, свесен дека неговите дејства може да доведат до штетни последици, но лекомислено сметал дека тие нема да се случат.
Обвинетиот му дозволил на својот син да управува со патничко моторно возило „Пежо 207“, иако знаел дека синот нема возачка дозвола и е повеќекратен прекршител на сообраќајни закони. Во текот на 2022, 2023 и 2024 година, синот имал повеќе сообраќајни прекршоци, вклучително и возење без возачка дозвола, возење под дејство на алкохол, непочитување на семафор и пешачки премин, како и две сообраќајни несреќи. На 29.01.2025 година, синот предизвикал сообраќајна несреќа со смртни последици.
