Зад затворени врати Советот на Јавни обвинители даде негативно мислење за предлогот на Владата за разрешување на јавниот обвинител Љупчо Коцевски. Од вкупно 9 членови, шестмина гласаа против предлогот за разрешување, а тројца се изјаснија позитивно.
Пред да дискутираат и гласаат за разрешувањето членовите одлучија да ја исклучат јавноста од седницата поради како што рекоа, заштита на интегритетот на државниот обвинител. Појаснија дека тоа го прават заради сензитивноста на предистражната постапка за трагедијата во Кочани, а и поради тоа што во неговиот одговор имало информации за дисциплинските постапки против двајца обвинители.
Седницата за разгледување на предлогот претходно беше одложена двапати. Прво беше закажана за 18 март, но беше одложена поради седумдневната жалост по трагедијата во Кочани.
Минатата недела, седницата повторно беше одложена поради недостаток на кворум односно не беа присутни двајца членови.
Минатата недела Владата најави ќе ја прекине постапката за разрешувањето и дека мислењето од Советот на јавни обвинители нема да го проследи до Собранието.
Премиерот Христијан Мицкоски,, пак, по трагедијата во Кочани, исто така изјави дека постапката за разрешување на Коцевски ќе се запре во моментот во кој се наоѓа поради важноста на предистражната постапка за најголемата трагедија што и се случи на Македонија.
Инаку, сериозни проблеми со функционалноста, неефикасност во кривичното гонење и нарушени меѓучовечки односи се наведени како дел од забелешките во образложението на Владата за разрешувањето на Коцевски.
На товар му се ставаат и крупни професионални грешки како и нарушување на угледот на Обвинителството.
Владата на 11 февруари годинава донесе одлука да поведе постапка за разрешување на државниот јавен обвинител Коцевски, кој беше избран на оваа позиција пред една година, а неговиот мандат трае шест години.
