Расипани автобуси, несоодветно одржување, притисоци од раководството врз вработените. Од „Синдикат за приватниот, административниот и јавниот сектор на Македонија“ – „СПАЈС“, алармираат дека состојбата со возниот парк во главниот град подолго време е загрижувачка, а надлежните не превземаат никакви мерки.
Нема доволен број автобуси и возачи за да ги покријат сите линии сопоред објавениот возен ред, па дел од граѓаните во метрополата се оставени сами да се снаоѓаат како знаат и умеат да стигнат до посакуваната дестинација. Генералниот секретар на „СПАЈС“, Меџит Идризи, алармираше за хаосот и притисоците со кои се соочуваат вработените во ЈСП и објаснува дека фалат најмалку 120 автобуси, а возачите кои се малку на број возат неисправни автобуси.
„Тие што се запалија се за во отпад. Можам да речам дека 50% се во исправна состојба. Директорот имаше наредба нека излезат на линија затоа што нема доволно возила, а од друга страна полиција ги исклучува затоа што многу димат. Они не го гледаат тоа така, само ти даваат документ дека е во исправна состојба“, изјави Меџит Идризи, генералниот секретар на ‘СПАЈС’.
Поради недостиг на возачи и нафта, автобусите со броеви „32“ до општина Сарај, „81“ до Блаце и „18 А“ до Визбегово воопшто не ни возат.
„Па можам да речам дека 60% моментално има нафта, повеќе нема. Автокоманда им одредува нафта само 80 литри, поише нема“, изјави Меџит Идризи, генералниот секретар на ‘СПАЈС’.
Идризи одговорноста ја гледа во директорот на претпријатието Драги Кушевски. Досега имал неколку обиди за средба со него, но не наишол на разбирање. И „Алфа“ побара одговори од раководството, но досега не не удостоија со одговор. Од „градот Скопје“, под чија управа спаѓа „ЈСП“, освен неколкукратна промена на директорите, градоначалничката Арсовска досега не изнајде решение за хаосот во јавното претпријатие.
