Со гордост и чест, денес ја одбележавме петгодишнината од пристапувањето на Македонија во НАТО, стратешка цел која стана наша реалност, изјави премиерот Христијан Мицкоски.
„Пет години сме дел од најмоќниот воен сојуз во светот, што значи пет години гарантирана безбедност, стабилност и партнерство со сојузници кои ги споделуваат истите вредности“, објави Мицкоски.
Тој нагласи дека посебна благодарност и почит придава кон македонската армија, која со својата професионалност и пожртвуваност ја носи Македонија на меѓународните мисии, потврдувајќи ја нашата улога како рамноправен партнер во зачувувањето на глобалниот мир и безбедност.
„Овие пет години ја зајакнаа нашата позиција и ни овозможија пристап до најсовремени воени стандарди, но ова не е крај, туку почеток на уште поголеми вложувања во безбедноста, армијата и нашите капацитети“, додаде Мицкоски.
