„По донесените 24 решенија за определување мерка притвор, беа поднесени 22 жалби од осомничените. По жалбите постапуваше Совет од тројца судии (по член 25 став 5 од ЗКП) на Основниот суд во Кочани, кој одлучи за 19 осомничени жалбите да се одбијат и мерката притвор да остане на сила, додека за 3 осомничени мерката притвор беше заменета со куќен притвор. Согласно член 144 и член 146 став 1 т. 3 од ЗКП, беше определена и мерка на претпазливост – привремено одземање на патна исправа или забрана за издавање на нова,“ појаснуваат денеска од Основниот суд во Кочани.
Против одлуката на Основниот суд во Кочани за замена на притворот со куќен притвор за двајцата поранешни градоначалници, Основното јавно обвинителство поднесе жалби пред Апелацискиот Суд во Штип, по кои се постапува.
„Против едно од решенијата на Советот од тројца судии (по член 25 став 5 од ЗКП) на Основен Суд во Кочани, со кое беше заменета мерката притвор со куќен притвор, нема поднесена жалба и истото е правосилно,“ велат од Основниот суд во Кочани.
Во притвор останува актуелниот градоначалник на Кочани, Љупчо Папазов, кој поднесе оставка од функцијата по трагедијата во Кочани во која загинаа 59 лица, а околу 200 беа повредени.
