За лицето од Радовиш, кое беше видено на видео на „Тик-Ток“ додека ја тепа својата сопруга, ќе се разгледува дали има основа за негово задржување, откако вчера беше приведено.
Од Обвинителството информираа дека постапката против него е во тек.
„Постапката против лицето е во тек врз основа на поднесената кривична пријава. Меѓу другото, ќе се испита дали во конкретниот случај постои основ за негово задржување. Јавното обвинителство и истражните органи се обврзани да постапуваат единствено врз основа на доказите во предметот“, велат од Јавното Обвинителство.
Претходно, МВР објави дека против 35-годишникот е поднесена кривична пријава, но во нивното соопштение не се наведува дали по приведувањето тој бил пуштен на слобода.
Според досега објавените информации, сопругата не сака да го гони, а во разговор со полицијата изјавила дека видеото е старо. Случајот го пријавила нејзината мајка, но сопругата тврди дека таа го прави тоа за да ги раздели, додека мајката од своја страна вели дека е загрижена за својата ќерка.
