Европската Унија ќе продолжи да бара решенија преку преговори, водејќи сметка за своите економски интереси, порача претседателката на Европската комисија, Урсула фон дер Лајен, во писмена изјава по повод најавата на Вашингтон за воведување царини за увозот на возила во САД.
„Како голема трговска сила и силна заедница од 27 земји членки, заеднички ќе ги заштитиме нашите работници, бизниси и потрошувачи во Европската унија,“ нагласи Фон дер Лајен, изразувајќи „длабоко жалење“ поради одлуката на САД да воведат царини за европскиот извоз на автомобили.
Фон дер Лајен повторно потсети дека царините се даноци кои се штетни за бизнисите и потрошувачите и во САД и во ЕУ, најавувајќи дека Унијата ќе ја процени оваа најава, заедно со другите мерки што ги предвидува Вашингтон во наредните денови.
„Автомобилската индустрија е двигател на иновации, конкурентност и висококвалитетни работни места, преку длабоко интегрирани синџири на снабдување од двете страни на Атлантикот,“ додаде Фон дер Лајен во изјавата.
Американскиот претседател Доналд Трамп најави воведување царини од 25 отсто за увозот на автомобили и лесни камиони во САД, кои треба да стапат на сила на 3 Април.
