Половина од пациентите кои се лекуваат во странство би можеле да се вратат дома во следните две недели, додека четворица од нив остануваат во критична состојба, информираше портпаролката на Владата, Љатифи Азизи, на прес-конференција. Таа истакна дека денеска, понеделник, 16 пациенти кои се лекуваат во Македонија ќе бидат пуштени на домашно лекување.
Портпаролката нагласи дека тим од хирурзи ќе се погрижи пациентите да не мораат да патуваат до болниците и дека дополнително штипската болница има 4 хирурзи за поддршка.
„ Според последните податоци, денеска ќе бидат испишани 16 пациенти кои се лекувале во земјата и лекувањето ќе го продолжат дома. Очекуваме дека во рок од две недели, половина од пациентите кои се лекуваат во странство ќе се вратат во Македонија, и се преземаат сите потребни мерки за нивно соодветно лекување. Во моментов во странство се лекуваат 116 пациенти, а оваа недела очекуваме 8 од нив да се вратат и да продолжат со лекувањето дома. Состојбата на некои пациенти и понатаму останува сериозна. Четири од пациентите кои се лекуваат во странство се во критична состојба, но правиме сè за да им обезбедиме потребен третман за подобрување на нивното здравје. Покрај негата, обезбедивме тим од хирурзи за поддршка на пациентите кои се лекуваат дома, така што тие не мораат да патуваат. Исто така, штипската болница има 4 хирурзи кои ќе бидат во постојана комуникација за да им обезбедат поддршка на пациентите. Здравствените установи се максимално посветени на обезбедување квалитетен третман и целосна рехабилитација на сите пациенти. Ќе продолжиме да информираме за состојбата на сите пациенти,“ изјави портпаролката.
Таа додаде дека истрагата продолжува со целосна посветеност и во соработка меѓу одговорните институции. Портпаролката Азизи нагласи дека Владата е решена да ја открие вистината за одговорните за трагедијата во Кочани и да се погрижи тие да одговараат за своите постапки.
