Македонската репрезентација во Вадуц победи за Кочани – натпреварот Лихтејнштан – Македонија заврши со резултат 0:3
Во 59-та минута на стадионот во Вадуц околу 1.200 македонци го скандираа името на градот Кочани оддавајќи почит на сите настрадани во дискотеката „Пулс“.
Нашата фудбалска репрезентација, во својот најтежок меч во историјата, попладнево во Вадуц, ја победи репрезентацијата на Лихтенштајн со 0:3 во првиот меч од квалификациите за пласман на Светското првенство 2026
Натпреварот помина во знакот на трагедијата во Кочани во која животот го загубија 59 лица.
Фудбалерите пред почетокот на натпреварот истрчаа на загревање во маици на кои беше испишано Кочани, а симболично во 59-та минута публиката со силен аплауз оддаде почит на жртвите.
Во натпревар со многу емоции, но без преголемо радување на головите, стрелци беа Александар Трајковски во 7-та, Висар Муслиу во 42-та и Бојан Миовски во 84-та минута. Избраниците на Благоја Милевски доминираа од почетокот на целиот натпревар.
Фудбалерите вечерва се враќаат за Скопје, а во вторник го пречекуваат Велс во вториот натпревар од квалификационата група за Мундијалот.
Инаку Фудбалската федерација на Македонија реши да ги пренамени сите средства од продажбата на билети за натпреварот против Велс во мундијалските квалификации и истите ќе завршат на сметката на семејствата на настраданите во трагедијата во Кочани.
Се очеува националната арена „Тодор Проески“ да биде исполнета до последно место, а навивачите да дадат голема поддршка за нашите репрезентативци, но воедно да искажат и сочуство за сите семејства кои претрпеа огромна загуба и траума.
Цената на влезниците изнесува 300 и 400 денари. Македонија ќе ја пречека селекцијата на Велс на 25 март, со почеток во 20:45 часот.
