Претседателката Гордана Сиљановска-Давкова се сретна со припаднички на Армијата, жени кои со својата професионалност, посветеност и истрајност не само што ги рушат стереотипите, туку и внесуваат нова димензија во вооружените сили.
На средбата присуствуваа полковник Елизабета Наумовска-Петрески, потполковник Александра Доневска, мајор Анета Куртелова и поручник Бојана Филиповска, кои зборуваа за својот професионален пат, статусот на жените во Армијата, како и за потребата од поголема застапеност на жените во формациските структури.
Во духот на Меѓународниот ден на жената, тие се вклучија во искрен и конструктивен разговор, споделувајќи приказни од своите кариери, исполнети со предизвици и предрасуди. Тие ја информираа претседателката дека, и покрај напредокот, жените во Армијата сè уште не се доволно застапени на клучни раководни позиции и често се соочуваат со ограничени можности за едукација.
Претседателката Сиљановска-Давкова нагласи дека во сите тела што ги формирала применува принципот на паритетна застапеност, не од матријархални побуди, туку заради уверувањето дека жените носат вредности како знаење, смиреност и мудрост кои не треба да бидат запоставени.
„Треба да ги еманципираме мажите за да ги прифатат жените како рамноправни, бидејќи досега светот беше машки и го видовме резултатот. Верувам дека промените се нераскинливо поврзани со женската одлучувачка улога, која уме да ги преусмери општествените текови и да остави женски печат!“ – изјави претседателката.
Сиљановска-Давкова истакна дека е нелогично по 80 години од формирањето на Обединетите Нации да нема жена генерална секретарка, како и тоа што е нелогично досега да нема жена генерал во Македонската Армија. Таа го охрабри началникот на Генералштабот да пронајде креативно решение за тоа да се постави жена на позиција генерал.
Во моментов, жените сочинуваат 11.87% од составот на Армијата, што е блиску до просекот на НАТО, но далеку од долгорочната цел од 30% застапеност.
Присутните се согласија дека силата на Армијата лежи во единството и синергијата помеѓу мажите и жените, а родовата рамноправност дополнително ќе го зајакне угледот на Армијата.
