Здружението на новинари на Македонија испрати апел и реагираше на непочитувањето на новинарските и етички стандарди од страна на дел од домашните и медиумите од регионот кои известуваа од погребите на жртвите во Кочани.
ЗНМ потсетува дека известувањето од денешниот погреб треба да биде во согласност со утврдениот протокол и основните принципи на професионалната етика. Објавувањето фотографии и видеа од гробни места, блиски членови на семејствата и приватни моменти е директно кршење на препораките за етичко известување и нарушување на достоинството на засегнатите лица. Ги повикуваме медиумските работници и редакции кои отстапуваат од протоколот да покажат почит и одговорност, да не објавуваат содржини кои можат да предизвикаат дополнителна болка и да се придржуваат кон стандардите на етичкото новинарство. Новинарството треба да биде во служба на јавниот интерес, но никогаш на сметка на човечкото достоинство, велат од ЗНМ.
Кон овој апел се приклучи и Независното здружение на новинари на Србија (НУНС).
-Порталот Република.рс грубо ги крши сите новинарски стандарди при известувањето од погребите во Кочани. ЗНМ ги повикува медиумските работници и уредниците да не отстапуваат од утврдениот протокол, да покажат почит и одговорност, да не објавуваат содржини кои можат да предизвикаат дополнителна болка и да се придржуваат кон стандардите на етичкото новинарство, се наведува во објавата на НУНС.
