Три дополнителни лица повредени во пожарот во Кочани ќе бидат лекувани во Турција, информираат од турската амбасада.
Денеска, три млади лица со авион беа пренесени во болницата „Чам и Сакура“ во Истанбул.
Турскиот амбасадор во земјава, Фатих Улусој, ги придружуваше повредените до Меѓународниот аеродром при нивното заминување од Скопје.
Во Турција моментално се лекуваат вкупно 12 повредени. Половина од нив се во болницата „Чам и Сакура“ во Истанбул, додека другата половина во болницата „Билкент Шехир“ во Анкара.
Заменик министерот за надворешни работи и главниот преговарач со ЕУ, Мехмет Кемал Бозај, изрази сочувство до македонскиот народ за трагедијата во Кочани.
– Во интервју за емисијата „Across the Balkans“, емитувана на „TRT World“, заменик министерот Бозај се осврна на трагичниот настан кој ја потресе Македонија и изрази сочувство. Додаде дека земјите од регионот континуирано си помагаат. Спомена дека по разорниот земјотрес во Турција во 2023 година, Северна Македонија испрати спасувачки тимови, и исто така, Турција веднаш по трагичниот пожар испрати авиони за пренос на повредените во Турција.
– „Овој гест на солидарност ја покажува нашата посветеност во поддршката на нашите соседи. Длабоко сочувство за загубените животи и брзо заздравување на ранетите,“ изјави Бозај.
