Почитувањето на основните права и владеењето на правото остануваат клучни за процесот на пристапување на Турција во ЕУ и тие ќе продолжат да бидат основа за односите помеѓу Унијата и Турција, истакнаа високата претставничка на ЕУ за надворешни работи и безбедносна политика, Каја Калас, и еврокомесарката за проширување, Марта Кос, по повод приведувањето на градоначалникот на Истанбул, Екрем Имамоглу.
„Како земја кандидат за членство во ЕУ и долгогодишен член на Советот на Европа, Турција е обврзана да ги спроведува највисоките демократски стандарди и практики“, нагласија Калас и Кос во заедничката изјава.
Тие додадоа дека ЕУ ги повикува турските власти да обезбедат целосна транспарентност во врска со апсењето на Имамоглу и да ги почитуваат соодветните правни процедури.
„Притворањето на градоначалникот Имамоглу, како и апсењата и обвиненијата против избрани функционери, политички активисти, претставници на граѓанското општество, бизнисот, новинари и други лица од почетокот на годината, отвораат прашања за патот на Турција во однос на нејзината долгогодишна демократска традиција“, додаваат Калас и Кос во изјавата.
