Јадранка Бреслиева, мајка на син кој беше спасен од пожарот во дискотеката „Пулс“ во Кочани, преку социјалните мрежи му изрази огромна благодарност и почит на младиот Јован.
Јован Костадинов (19) од Виница не само што го спасил нејзиниот син, туку и 21 друго дете.
„Со голема благодарност и емотивна почит, сакам да го споделам херојскиот чин на Јован Костадинов од Виница, кој не само што ги спаси животите на 21 дете во трагичната несреќа во ноќниот клуб во Кочани, туку го спаси и мојот син. Во најтемните моменти на паника и хаос, кога сите беа збунети и во страв, Јован се појави како светлина на надеж. Без да размислува, го зеде мојот син, кој беше под рушевините на дискотеката, и го носеше на својот грб низ огнот и чадот, сè до болницата во Кочани, со цел да го спаси, додека сите наоколу беа зафатени со спасување на својот живот.“
„Јован е вистински херој – младо момче со големо срце и неописива храброст, кое го ризикуваше својот живот за да спаси туѓи. Ти го должам новото утре, новата насмевка, новата надеж и новиот живот на мојот син. За тебе нема зборови кои можат да ја искажат мојата благодарност и почит.
Благодарност од дното на срцето. Ти ми го даде најголемиот подарок што може да го добие една мајка, го спаси животот на моето дете. Ти ќе останеш засекогаш во моите молитви и во нашите срца“, напиша Јадранка.
