АЦВ за снимањето со дронови на собирите: Прекршувањето на правилата со оправдување „не знаевме” е неприфатливо
Агенцијата за цивилно воздухопловство (АЦВ) денеска излезе со соопштение во кое ја истакнува неприфатливоста на прекршувањето на правилата со оправдување „не знаевме”, во врска со вчерашните настани, кога новинарски екипи биле повикани на разговор во полиција поради снимање со дронови без соодветна дозвола на собирите во Скопје.
Во соопштението, АЦВ напоменува дека лицата кои управувале со дронови при овие настани морале да бидат регистрирани оператори на дронови и да поседуваат сертификат за регистриран оператор издаден од АЦВ. Истите, како што се нагласува, не смееле да ја надлетуваат групата на луѓе, бидејќи во ниту една категорија на операции со дронови (А1, А2 или А3) не е дозволено да се надлетуваат собири на луѓе.
Агенцијата потсетува дека креирањето на забранета зона за летање со воздухоплови без екипаж се објавува веднаш по креирањето на мапата за резервиран воздушен простор, која е достапна 24/7 на веб-страниците www.drone.gov.mk и www.caa.gov.mk. Притоа, секој оператор на дрон пред да започне со летот, е должен да го најави летот и да се запознае со состојбата во воздушниот простор.
АЦВ исто така нагласува дека Правилникот за воздухоплови без екипаж, кој ја имплементира европската регулатива, стапува на сила на 1 јуни 2024 година, но со одложена примена до 1 јануари 2025 година. Во текот на 2024 година, АЦВ презеде активности за информирање на јавноста, вклучувајќи медиуми и корисници на дронови, за новата регулатива.
Во соопштението, АЦВ потсетува дека забраната за директно надлетување на луѓе со дронови е на сила од 2015 година и е предвидена со „Уредба за условите под кои воздухоплов без екипаж може да лета во македонски воздушен простор”. Со новиот правилник, оваа забрана продолжува да важи, а операторите кои управуваат со дронови мораат да бидат упатени и сертифицирани за тоа.
АЦВ исто така апелира дека операторите на дронови можат да летаат во близина на луѓе само доколку поседуваат соодветно оперативно одобрение издадено од АЦВ, а секоја зона за летање со дронови се објавува и ја следи на мапата за воздушен простор.
